Azərbaycan Respublikasında kənd təsərrüfatının inkişafı dövlət siyasətinin mühüm istiqamətlərindən biri olaraq daim diqqət mərkəzində saxlanılır. Bu baxımdan, mayın 25-də Azərbaycan Prezidenti, İlham Əliyevin rəhbərliyi ilə kənd təsərrüfatı sahəsinə dair keçirilən müşavirə aqrar sahənin gələcək inkişaf strategiyasının müəyyənləşdirilməsi baxımından xüsusi əhəmiyyət kəsb edib.
Müşavirə zamanı ölkə başçısı kənd təsərrüfatının inkişaf perspektivləri, su ehtiyatlarının düzgün idarə olunması və meliorasiya sistemlərinin təkmilləşdirilməsi məsələlərinə toxunub. Xüsusilə su təminatının yaxşılaşdırılmasının kənd təsərrüfatında məhsuldarlığın artırılması üçün vacib amillərdən biri olduğu vurğulanıb.
Prezident çıxışında Şirvan kanalının yenidən qurulması layihəsinin strateji əhəmiyyətini ön plana çəkərək bildirib ki, bu təşəbbüs həm torpaq sahələrinin daha səmərəli suvarılmasına, həm də ölkənin ərzaq təhlükəsizliyinin möhkəmlənməsinə mühüm töhfə verəcək. Uzun illər istismarda olan kanalın texniki baxımdan köhnəlməsi su itkilərinin artmasına səbəb olduğundan, onun müasir standartlara uyğun yenidən qurulması zərurətə çevrilib.
Qeyd olunub ki, layihənin həyata keçirilməsi nəticəsində yüz minlərlə hektar əkin sahəsinin su təminatı yaxşılaşacaq, yeni torpaq sahələrinin istifadəsi genişlənəcək və fermerlərin məhsuldarlıq imkanları artacaq. Bu isə kənd təsərrüfatının ümumi inkişafına və regionlarda iqtisadi fəallığın güclənməsinə müsbət təsir göstərəcək.
Eyni zamanda, ölkədə müasir suvarma texnologiyalarının tətbiqi, yeni su anbarlarının yaradılması və kanalların yenilənməsi istiqamətində ardıcıl işlərin aparıldığı diqqətə çatdırılıb. Şirvan kanalının yenidən qurulması da məhz bu məqsədyönlü siyasətin mühüm tərkib hissələrindən biri hesab olunur.
Sonda bildirilib ki, aqrar sektorun inkişafı yalnız kənd təsərrüfatının gücləndirilməsi deyil, eyni zamanda regionların sosial rifahının yüksəlməsi, yeni məşğulluq imkanlarının yaranması və qeyri-neft sektorunun inkişafı baxımından da mühüm rol oynayır.
Ülvi Salmanov
YAP Abşeron rayon təşkilatının sədr müavini